2 pintor natagak, 1 patay

CEBU, Philippines – Usa ang patay ug usa ‘sab ang milagrong nabuhi human natagak ang duha nga nagtungtong sa damba gikan sa ika-11 nga andana sa gitrabaho nilang building sa Cebu Business Park kagahapong adlawa.

Ang namatay giila nga si Jovito Alvarado, 42,  samtang naangol si Cristino Copta, 21, pulos taga dakbayan sa Toledo. Laing usa nila ka kauban nga si Arthuro Obiso nga nabitay sa taas sa building sud sa tulo ka minutos. “Mga tulo ka minutos g’yud ko nagbitay sa taas ayha ko nakanaog, maayo na lang ang pisi nako nahikot sa lain nga damba. Nakakita g’yud ko sa hitabo, luoy kaayo , wala man pud ko’y mahimo,” sigun pa ni Obiso sa Banat News.

Ang damba ginama sa gisumpay-sumpay nga mga kabilya nga gibutangan og mga table nga patongan sa mga trabahante nga namintal sa bungbong. Sumala pa ni Obiso nga nabali ang kabilya nga gitungtongan sa duha hinungdan sa ilang pagkatagak, ang maong kabilya usab maoy gihiktan sa mga harness sa mga biktima.

Usa sa mga lead man sa maong construction site nga nahinabi sa Banat News mitug-an nga una na kini nakabantay nga delikado ang gandula nga ilang gigamit kay kini gabok ug gagmay ang kabilya nga gigamit.

“Tag 100 thousand daw abang namo anang gandula unya delikado kaayo, ingon man sila nga okey ra kuno bisan upat pa ka tawo motungtong ato, pero nanghinaw nako ato kay delikado man g’yud tan-aw nako. Wala g’yud ko nasipyat, nahitabo g’yud,” sigun pa sa lead man nga nagdumili pagpaila.

Usa  ka safety officer sa laing construction site nga nanguryoso sa nahitaboan nga nahinabi sa Banat News miingon nga base sa iyang nakita dili g’yud luwas ang maong damba.

“Bisan og unsaon nimo og tan-aw ana delikado kaayo na, kataas gud ana dapat kadtong pinaka safe ang gamiton kay kinabuhi gud nang naa sa taas.”

Gisuwayan pagkuha’g pamahayag sa Banat News ang mga tagdumala sa maong construction firm apan nagdumili sila sa pagtubag, gani ang mga polis sa Mabolo Police Station nga moimbestigar wala pasudla sa guwardiya. – /EIM) (BANAT NEWS)