Kasaysayan sa mga gilubong sa Doña Pepang ibutang sa libro

CEBU, Philippines - Gustong rebisahon ni Cebu City Mayor Michael Rama ang orihinal nga desinyo alang sa himuong parke sa karaang Roman Catholic Cemetery kun mas nailhang Doña Pepang Cemetery.

“Design is good but we need practicability,” matud ni Rama kinsa mipasabot nga ang orihinal nga desinyo sa panahon ni kanhi mayor Tomas Osmeña nindot apan buot niyang usbon ug himuong mas praktikal. Plano usab ni Rama nga himoan og Coffee Table book ang kinabuhi sa mga prominenteng mga tawo ug bisan kadtong mga ordinaryong mga tawo nga gilubong sa maong sam-ang.

Ang maong libro magtuki di lang sa mga kinabuhi sa mga tawo apan apil na ang kasaysayan sa maong dapit tungod kay nasabotan sa panagtigom tali sa mga tagtungod sa mga gipanglubong ang pagpreserbar sa kasaysayan sa lugar.

Nganlan usab kini og Cebu Heritage Park aron paghatag og pasidungog di lang sa Sugbo apan apil na ang mga tawo nga gipanglubong sa maong sam-ang.

Ang tanan nagkauyon sa maong proyekto apan kinahanglan nga ipreserbar ang kasaysayan sa lugar ug ugmaron kini aron monindot.

Ang numero unong supak sa pagpanindot sa lugar nga si kanhi mayor Tomas Osmeña wala motambong sa maong tigom kay matud niya wa siya imbitara.  (BANAT NEWS)