AFP nangandam sa seguridad ni Pope Francis
CEBU, Philippines - Motabang sa pangandam sa seguridad sa Santo Papa, Pope Francis, ang Armed Forces of the Philippines sumala pa sa luyoluyong hepe sa militar.
Si Lieutenant General John Bonafos, AFP Vice Chief of Staff, miingon nga apil sila sa pagpangandam alang sa pagbisita sa Papa sa sunod bulan.
Sumala ni Bonafos nga may mga report nga dunay mga hulga silang nadawat apan ila kining gisusi kun posible bang mahitabo ang maong mga hulga sa pagbisita sa lider sa binilyon ka mga Romano Katoliko sa kalibotan.
Matud pa ni Bonafos nga kinahanglang way mahitabong dautan mugna sa mga tawo o pundok nga buot mosamok sa pagduaw sa Santo Papa karong Enero.
Gipaabot nga mopahigayon og Santos nga Misa si Pope Francis sa Tacloban City nga usa sa grabing naigo sa Super Typhoon Yolanda ug hangtod karon padayon pa kini sa iyang pagbangon gikan sa maong katalagman.
Matud ni Bonafos nga bisan pa man wala pa madeklarar nga “insurgency free” ang Tacloban apan matud pa niya nga wala silay na-monitor nga mga lihok sa armadong pundok sa maong lugar.
Nagtuo hinuon si Bonafos nga magpanuko og himo og pagpangatake ang mga rebeldeng komunista sa Eastern Visayas tungod kay ang katawhan man unya ang ilang makontra.
Apan bisan pa man niini, ang AFP di mokompiyansa ug gani mipahigayon na sila og mga war games o military exercises aron mabansay daan ang mga tropa nga mobantay sa Santo Papa sa higayon nga dunay kagubot nga motumaw.
Si Pope Francis moabot sa nasud karong Enero 15 ug mobalik sa Roma sa Enero 19, iyang duwaon ang mga biktima sa bagyong Yolanda sa maong siyudad. (BANAT NEWS)
- Latest
