Presyo sa tubig sa MCWD momahal sa Enero 2015

CEBU, Philippines - Ipatuman karong sunod tuig sa buwan sa Enero ang usbaw sa presyo sa matag metro kubiko sa tubig gikan sa Metro Cebu Water District (MCWD).

Sud sa walo ka tuig, P13.60 ra ang minimum sa matag metro kubiko apan sugod karong Enero himuon na kining P15.20

Ang usbaw sa singil sa tubig giaprobahan sa Local Water Utilities Administration (LWUA) Board of Trustees niadtong Agusto 7, 2014. Ang kataposang higayon nga nisaka ang presyo sa tubig sa MCWD niadto pang Hulyo 1, 2006. Apan bisan pa man sa bag-ong water rate, kadtong mga pamilya nga mikonsumo og tubig nga dili molapas sa 30 ka metro kubiko matag buwan makabenepisyo gihapon sa subsidy gikan sa MCWD.

Ang mga gagmay nga pamilya o panimalay sagad mokonsumo lang og napulo ka metro kubiko  o singkwenta ka drum nga tubig matag buwan. Sila modugang og P1.60 sa ilang bayrunon kada metriko kubiko nga tubig o P16.00 sa napulo ka metro kubiko.

Ang MCWD mopalit og tubig gikan sa mga supplier wells niini sa kantidad nga P22 matag metro kubiko apan gibaligya lang nila kini sa mas ubos nga presyo sukad pa kaniadto.

Apan  karong Enero gikan sa P15.00 mamahimo nang P16.80 niadtong mokonsumo og 11 hangtud 20 metro kubiko matag buwan.

Kadtong mokunsumo og 21 hangtud 30 ka metro kubiko matag buwan nga nagbayad kaniadto og P17.65 magbayad na og P19.77 matag metro kubiko.

Ang commercial rates o kadtong mga kompanya, pabrika, o planta nga mokonsumo og daghang tubig lapas 30 metro kubiko matag buwan makabayad sila og P48.40.

“Thanks to improved efficiency, made possible by the commitment of the employees and the support of the board which represents the consuming public, the water district did not increase water rates for more than eight years despite its expansion projects and inflation,” si MCWD Acting General Manager Engr. Ernie T. Delco miingon.

Ang MCWD nagtinguha  nga patas-an ang produksyon niini gikan sa P210,000 metro kubiko ngadto na sa P340,00 metro kubiko matag adlaw. (BANAT NEWS)