Masakpan molabay basura palitratohan
CEBU, Philippines - Giawhag sa City Environment and Natural Resources Office sa dakbayan sa Lapu-Lapu ang mga residente nga kuhaan og hulagway ang bisan kinsa nga magpataka og labay sa basura.
Lakip sa gidasig ang kapolisan nga motabang sa Task Force Kalikasan sa pagpakigtambayayong sa CENRO alang sa kalimpyo sa dakbayan.
Si Engr. Roderino Taga-an, pangulo sa CENRO sa siyudad, nagkanayun nga aduna sila’y nadawat nga mga reklamo labot sa mga indibidwal nga molabay og mga basura sa mga bakanteng lote sa mga barangay.
Ang mga tag-iya sa mga resorts ug hotels mireklamo sab nga adunay mga basura nga gipanglabay duol sa ilang establesemento.
Ang barangay Marigondon, Mactan, Buaya ug Ibo mireklamo sab sa samang isyu sa basura.
Dugang ni Taga-an nga ang pagkolekta sa basura sa siyudad gibutang sa alas 4 sa kadlawon hangtud sa alas 12 sa udto ug alas 6 hangtud alas 12 sa gabii. (BANAT NEWS)
- Latest
