CEBU, Philippines – Nalandig sa tambalanan ang 63-anyos nga inahan human gidunggab sa iyang anak gamit ang buak nga botelya sa sitio Manggahan, Poblacion, Pinamungajan kagahapon sa buntag.
Ang biktima naila nga si Ruperta Fajardo samtang ang nidunggab mao si Sergio Fajardo, 28, dunay kapuyo.
Matud ni PO1 John Tellidua, desk officer sa Pinamungajan Police, nga samtang nag-init og tubig ang inahan kalit lang niduol ang anak dala ang usa ka botelya. Sumala pa nga kalit lang gibuak sa anak ang botelya ug gidunggab sa iyang inahan igo sa paa, tuhod ug sa siko.
Dali nakapangayo og pakitabang ang inahan ug gidala sa tambalanan samtang ang anak nasikop sa kapolisan ug temporaryong gibalhug sa selda sa Pinamungajan Police Station.
Sa nakuha nga impormasyon ni Tellidua nga dunay problema sa pangisip ang anak ug usahay motukar. – /GMR) (BANAT NEWS)