Mga batan-on gusto na og sex

CEBU, Philippines – Dul-an sa katunga sa 1.4 milyones ka mga batan-on sa Central Visayas ang nakasinati na og pagpakighilawas gikan sa edad nga 15 hangtud 24.

Kini base sa pagtuon sa University of the Philippines Population Institute (UPPI).

Base sa UPPI’s 2013 Young Adult Fertility and Sexuality (YAFS)   study, sa 1,425,883 ka batan-on sa rehiyon, 503,000 ang nihimo na og pre-marital sex samtang 73,000 niini ang nakasinati og “casual sex.” Nasuta usab sa pagtuon nga 376,411 ka batan-ong babaye edad 15 ngadto sa 19 ang nimabdos sa niaging tuig. Nunot niini, si Population Commission-7 Director Bruce Ragas niangkon nga makapaalarma na ang maong taho ilabi na nga dunay 12-anyos nga nahimo na nga inahan.

Matud ni Ragas nga ang sayong pagmabdos sa usa ka batan-ong babaye nakaguba sa iyang kaugmaon.

Ang sex education ug good parenting ang nakita ni Ragas nga sulbad sa maong problema sanglit ang mga batan-on adto sa ilang barkada makisayud bahin sa sex.

Ang pagtuon nagbutyag usab nga taas kaayo ang exposure sa mga batan-on bahin sa sex pinaagi sa x-rated videos. Nasayran usab nga 1.3 porsiyento mag-video sa ilang pakighilawas, 3.5 porsiyento nakighilawas sa ila lang naila-ila sa text o online ug 9.6 porsiyento nihimo og phone sex. (Gikan sa The Freeman/GMR) (BANAT NEWS)