CEBU, Philippines - Nasikop sa kapolisan ang usa ka lalaki nga wanted diay sa kasong robbery with homicide sa lungsod sa Tabuelan sa miaging gabii.
Ang nasikop naila nga si Jomar Baldomar, molupyo sa Lungsod sa Mabinay, Negros Oriental kinsa nasakpang nagdala og kinarnap nga motor nga iyaha untang dad-on ngadto sa Negros.
Matud pa nga dunay mitawag sa kapolisan ug mipahibalo bahin sa usa ka kadudahan kaayong bag nga gibilin sa usa ka drayber sa motor nga kadudahan og lihok diha sa usa ka videoke bar sa Sitio Quasi, Barangay Poblacion.
Si Police Officer 1 Jerome Millor miingon nga nasigpatan sa pantalan ang maong lalaki ug nakabantay dayon sila nga kadudahan ang lihok niini hinungdan nga gipangayoan siya sa papeles sa motorsiklo nga iyang gidala.
Ang papeles sa motor nga gipakita sa suspek orihinal nga dokumento apan wala ni marehistro sa iyang ngalan.
Dihang gisusi sa kapolisan ang tag-iya sa maong motor, nasuta nga gi-carnap diay kini niadtong Nobiyembre 27,2014 sa lungsod sa Catmon.
Ang suspek nagpaila siya si Jomar Cadusali nga taga Bais City, Negros Oriental.
Dihang gisubay ni Superintendent Anthony Bagarinao, deputy provincial director for operations ang pagkatawo sa suspek nasuta nga may pending warrant of arrest diay kini sa maong lugar sa kasong robbery with homicide.
Nakuha sab sa kapolisan ang klase-klaseng IDs sa nagkalain-laing tawo, ignition coil ug mechanical tools. (BANAT NEWS)