Tulo patay, siyam na-missing kang Queenie

CEBU, Philippines - Muabot sa tulo ka tawo ang patay ug siyam ang na- missing atol sa pag-igo sa bagyong Queenie sa rehiyon-7 niadtong nakalabay nga adlaw.

Kini maoy gitug-an ni Allen Froilan Cabaron ang Civil Defense Officer sa Office of the Civil Defense (OCD-7) nga nahinabi sa mga tigbalita.

Unom niini gikan sa Negros Oriental, duha sa probinsiya sa Bohol ug usa sa probinsiya sa Sugbo.

Tulo ‘sab ang natala nga kompirmado nga namatay diin duha sa Bohol ug usa sa probinsiya sa Sugbo, ug duha ‘sab ang natala nga naangol didto sa Bohol.

Matud pa ni Cabaron nga ang probinsiya sa Bohol maoy grabe nga apektado sa maong bagyo.

Ang lungsod sa Duero, Jagna, Guindulman, Ubay, Garcia, Hernandez mao’y apektado sa maong hitabo, diin duna’y 110 ka mga balay ang nadanyos ug 875 ka mga balay ang partially damage.

Usa sa nakita sa OCD-7 kun nganong dili makab-ot ang target sa kagamhanan nga “zero casualty” kay duna gayu’y mga mananagat nga mulawod bisan og dili na maayo ang panahon gumikan sa kalisod.

Gitug-an ‘sab ni Cabaron nga dako ‘sab og tabang ang maayong pagpasabot sa katawhan kabahin sa pagpangandam sa bagyong muabot kay duna naman sila’y mga dili maayong kasinatian kaniadto.

Dili pa makahatag ang OCD-7 sa kinatibuk-ang danyos sa bagyo sa mga infrastructures project nga nadaot sa maong bagyo gumikan ila pang gipaabot ang report gikan sa Department of Public Works and Highways (DPWH). (Jojo C. Ugdol/EIM)(BANAT NEWS)