P12M nga budyong gisakmit
CEBU, Philippines - Gisakmit sa National Bureau of Investigation-7 ug Provincial Environment and Natural Resources (PENRO) ang 210 ka kahon nga bayanan sa budyong kagahapon sa Pier 6 gikan sa Zamboanga.
Gipangulohan nilang NBI Agent Rey Villordon ug pangulo sa PENRO-Capitol, Chad Estella, ilang giimplementar ang search warrant nag giluwatan ni Regional Trial Court Judge Sylva Paderanga.
Kauban sa grupo ang mga tinugyanan sa Bureau of Fisheries and Aquatic Resources (BFAR).
Matud ni Villordon nga ang kantidad sa maong 210 nga kahon mokabat sa P12.6 milyones.
Ang NBI-7 nakadawat og report labot sa kargamento gikan sa Zamboanga nga muabot sa Sugbo.
Gikan sa usa ka Edgar Mendoza sa Zamboanga ang kargamento ug gidawat kini sa usa ka Windell Bisucatan sa dakbayan sa Mandaue.
Matud ni Villordon nga ila na nga gipatawag si Bisucatan niadtong Lunes apan wala makit-i.
Ila usab susihon ang Lorenzo Shipping Lines kung may kalambigitan ba sa ilegal nga transaksiyon.
Apan matud ni Weiland Mayuga, operation supervisor sa Lorenzo Shipping Lines, nga wala sila’y katungod pag-abli sa kargamento.
Padayon ang imbestigasyon sa mga hingtungdang ahensiya kabahin sa maong pagpalusot sa mga kinhason aron kini mapasakaan sa tukmang kaso.
Ang pagpahigayon og imbentaryo sa maong mga endangered species ipahigayon sa dakbayan sa Naga sa luna nga gipanag-iya sa Kapitolyo. (BANAT NEWS)
- Latest
