Helper nangawat dakpan

CEBU, Philippines - Nadakpan sa kapolisan ang katabang nga lalaki sa usa ka panimalay sa sitio Pasil, Cogon East, lungsod sa Carmen nga misibat dala ang kapin sa P500 mil, duha ka singsing nga bulawan ug 115 nga US dolyares nga salapi.

Ang nadakpan mao si Fermito Berrot, 20-anyos nga taga Upper Natimaw-an, sa maong lungsod ug katabang sa panimalay sa biktima nga si Charity Villamor Lunkin, 30-anyos.

Si  Senior Police Officer 3 Danilo Laurente sa Carmen Police Station miingon nga niadto pa’ng Nobiyembre 8  nahitabo ang pagpangawat sa panimalay dihang ang iyang tibuok pamilya nagsaulog sa birthday sa anak sa dakbayan sa Sugbo.

Giingong gisaka ang lawak sa panimalay sa biktima pinaagi sa pagkatkat sa ikaduhang andana nga gigamitan og hagdan paingon sa pag-agi sa bintana.

Matud ni SPO3 Laurente sa follow-up operation nga ilang gihimo  ilang nadakpan ang suspek sa panimalay sa hinigugma niini sa barangay Cantumog, sa maong lungsod alas tres ang takna sa hapon niadtong Martes.

Nunot sa pagkasikop sa suspek, ilang narekober ang salapi nga P300 mil kapin, usa ka singsing nga bulawan ug ang $115 nga salapi nga wala pa niini magamit.

Ang suspek nagtingkagol na sulod sa bilanggoan sa Carmen Police Station ug kasong qualified theft ang iyang atubangon. (BANAT NEWS)