Piyansado gipamusil, usa patay

CEBU, Philippines – Usa ang patay samtang usa ang angol sa managlahi nga pagpamusil sa dakbayan sa Lapu-Lapu sa niaging  Domingo.

Si Ritchie Getizo, 27-anyos, taga Kagudoy, Basak ang gipusil sa makadaghang higayun sa may gate sa St. Joseph Birthing Home sa sitio Kulo, barangay Pajac alas 12:55 sa kadlawon.

Matud ni PO2 Joseph Rouel Cutanda sa Lapu-Lapu City Police Office nga upat ka wala mailhing lalaki nga nagsakay sa lainlaing motorsiklo ang nipusil sa biktima.

Ang inahan sa biktima nga si Angelina miingon nga ang iyang anak mitug-an nga nakadawat siya og hulga.

Si PO2 Cutanda nagkanayon nga ang biktima tiggamitan og ginadiling drugas ug usa ka drug peddler sa mao nga dapit.

Lima ka gagmay’ng pakete nga gituohang shabu ug walo ka rolyo sa aluminum foil ang narekober gikan ni Getizo.

Usa ka cellphone ug unom ka empty shells sa usa ka caliber .45 ang nadiskubre sa crime scene.

Samtang sa ML Quezon Highway sa barangay Pajo, ang 25-anyos nga si Albert Ramirez nga taga Pilipog, Cordova ug usa ka dispatcher ang gipusil alas 6:25 sa gabii samtang nag-asikaso sa mga pasahero sa jeep.

Matud ni SPO1 Allan Pantaleon, ang kapuyo sa biktima nga si Marlen Zapanta, 24, nagkanayon nga samtang naglingkod siya sa waiting shed, kalit niduol ang suspek dayun pamusil.

Piyansado sa kasong pagpangawat sa usa ka langyaw ang biktima.

Nakaangkon og samad pinusilan sa tuong bahin sa dughan si Ramirez ug daling gidala sa Vicente Sotto Memorial Medical Center.

Ang suspek gihulagway nga nagsul-ob og pink nga jacket, bull cap ug sunglasses kinsa daling nisibat. – /GMR) (BANAT NEWS)