Mga agawon pahatagon g’yud og 13th month pay

CEBU, Philippines - Si Konsehal Sisinio Andales miapil pag-awhag sa mga tagdumala og pribado nga kompaniya sa dakbayan sa Sugbo nga ihatag g’yud sa ilang mga trabahante ang 13th month pay sa dili pa ang Pasko.

Ang awhag ni Andales gihimo human siya makadawat og report nga adunay mga agawon nga dili motuman sa ilang obligasyon ngadto sa tagsa-tagsa nila ka mga kawani.

Base sa Labor Advisory sa Department of Labor and Employment (DOLE), ang mga agawon kinahanglan nga mohatag gayud og 13th month pay nga katumbas sa usa ka buwan nila nga suweldo.

Ang balaud naglatid nga kinahanglan nga sa dili pa ang Disyembre 24, ihatag na ang 13th month pay. Kun ang katunga gihatag na kaniadto’ng Hunyo, ang katunga na lang ang ilang ihatag.

Hinuon, kadto’ng mga establisamento nga wala pa kaabot og usa ka tuig gikan sa iyang pag-operate, wala pugsa sa paghatag sa mao nga benepisyo sa mga kawani kun wala kini magdawat og pinansyal nga tabang gikan sa mga foreign investors.

Dili apil sa pagkuwenta sa 13th month pay ang ubang extra pay sa usa ka kawani.

Ang kinatibuk-an nga “basic pay” sa usa ka kawani sumadahon ug bahinon og 12, ug ang 1/12 nga bahin maoy kantidad nga madawat niini isip 13th month pay.

Ang mga kawani nga dili hatagan sa ilang benepisyo giawhag pag-report niini ngadto sa DOLE. (BANAT NEWS)