Moli-moli, video karera machines sakmit
CEBU, Philippines - Nasakmit ang 13 ka mga illegal gambling machines nga gilangkuban sa pito ka moli-moli ug unom ka video karera sa usa ka saturation drive sa Sambag 2, siyudad sa Sugbo niadtong Martes.
“Nanawag man ang taga barangay, magpatabang daw sila kay daghan kaayo og kaso (video karera) didto, maong among gi- aksyonan,” sigun ni Police Chief Inspector Romeo Santander, hepe sa City Intelligence Branch, Cebu City Police Office.
Nakuha ang maong mga machines sulod sa usa ka minantinir nga kwarto sulod sa lugar nga gi-abandonar sa mga tig-atiman.
Apan nakalitan ang konsehal sa barangay, Ryan Aznar, dihang wala sila’y nasakpan nga nagduwa sa maong dapit ug mingaw sab kini atol sa ilang operasyon.
“Mostly man gud, magbinuntagay na sila, nahibong na lang mi nganong mingaw man, naa gyud seguro’y ni-leak nga information. Prior ani, nag-raid na gud to pag July, but two days after nibalik na pud dayon og operate,” matud ni Aznar.
Gisusama ni Aznar ang problema sa illegal gambling sa drugas ug pagpangawat sa maong lugar mao nga gihatagan kini og igo nga pagtagad sa mga opisyal.
Giguba ang 13 ka machines atubangan sa mga residente sa barangay isip pahimangno nga seryoso ang kapolisan sa pagkombate batok sa mga ilegal nga buhat. (BANAT NEWS)
- Latest
