CEBU, Philippines - Duha ang patay sa duha ka buwag nga pagpamusil sa dakbayan sa Sugbo niadtong nakalabay nga adlaw.
Pasado alas 10 sa buntag sa sitio Upper Yati, Quiot, usa ka 56-anyos nga guwardiya ang gipusil patay sa usa ka lalaki human gibadlong nga namutol og kahoy sa lugar nga iyang gibantayan.
Ang biktima naila nga si Loreto Tabañag, sakop sa PHILOSA Agency kinsa nagpuyo sa maong lugar samtang ang suspek naila nga si Calexto Tejares alyas Calex, hingkod ug lumad nga taga Binobohan, Guihulngan, Negros Oriental.
Matud ni PO1 Reoful Adalim sa homicide section sa Cebu City Police Office (CCPO) nga samtang may kaestorya ang guwardiya daplin sa dalan, kalit lang mitungha ang suspek dayun namusil.
Sigun pa ni Adalim nga nagkabikil na kaniadto ang duha human gibadlong sa guwardiya si Tejares nga namutol og kahoy sa yuta nga ilang gibantayan.
Samtang patay sab ang usa ka 33-anyos nga lalaki human pusila sa iyang silingan nga naningil sa kuwang nga P500 sa gipalit nga air gun sa suspek sa sitio Baogo, Cambinocot, Cebu City.
Ang biktima naila nga si Erwin Ayag, mag-uuma, samtang ang suspek naila nga si Jerry Arnoco, 44, pareho nga nagpuyo sa maong lugar.
Ang duha nagkalalis sa gipaningil nga utang hinungdan nga ang suspek naglagot ug nikuha sa dala nga .45 caliber pistol dayun pusil sa makadaghan nga higayon sa biktima. (BANAT NEWS)