CEBU, Philippines - Nakaikyas ang duha ug usa ang nasikop human usa ka motorsiklo nga sakay ang tulo ka lalaki ang gipara sa kapolisan sa San Nicolas Police atol sa checkpoint sa Katipunan Street, A. Lopez, Labangon, dakbayan sa Sugbo sa niaging kaadlawon.
Ang nasikop naila nga si Arturo Temblor, 40, taga Poblacion, Alcantara.
Ang kapolisan sa San Nicolas Police nga gipangulohan sa deputy chief, Insp. Percibal Miasco, ang nihimo sa checkpoint.
Giingong nakainom ang tulo nga sakay sa motorsiklo ug wala nag-helmet. Atol sa pagsita sa kapolisan nahitabo ang komosyon ug nakasibat ang duha ka kauban ni Temblor kinsa nakuhaan og usa ka pakete nga druga.
Bisan gipusasan si Temblor nga gipasandig sa police car, kusog kini nga nikaratil og dagan ug nahitabo ang ginukdanay.
Samad sa nawong ang naangkon ni Temblor human naumod sa karsada samtang usa sab ka polis ang napangos human naapil pagkatumba atol sa ginukdanay ug linayugay.
Ang dinakpan suway unta nga mosibat kay mauwaw mahibaw-an sa iyang pamilya nga siya nasikop. Gitanggong sa Punta Princesa Police Station ang dinakpan. (BANAT NEWS)