CEBU, Philippines – Human sa dul-an usa ka semana nga surveillance sa kapulisan, nasikop sa mga operatiba ang usa ka gipasanginlang level 2 drug pusher nga milansar pa pagkakonsehal niadtong eleksiyon sa tuig 2013, diha sa Echavez Street, Lorega San Miguel kagabii.
Ang nasikop mao si Francis Rafols, 34, duna’y ka live-in partner ug nagpuyo sa maong lugar.
Matud pa ni Superintendent Romeo Santander ang hepe sa City Intelligence Branch sa Cebu City Police Office nga nahinabi sa Banat News dunay misumbong kanila bahin sa ilegal nga negosyo ni Rafols hinungdan sa gihimo nilang surveillance.
Giangkon ni Santander nga ila gilusad ang operasyon human dunay naka-tip kanila nga bag-ohay pang nahatdan og supply sa drugas ang suspek. Nasakmit sa kapolisan ang 21 ka medium size nga putos sa gituohang shabu nga gibanabanang P1.3 milyon ug cash nga P3,000.
Gisikop si Rafols human nga nibaligya og usa ka putos nga drugas sa asset sa kapulisan. Matud ni Santander nga pinili lang ang mga tawo nga makasulod sa gipuy-an ni Rafols kay didto kini mag-repack sa drugas ug igo lang niini ihatud sa iyang drug den sa sudlonon nga bahin sa barangay ang drugas.
Si Kapitan Fritz Gerrald Herrera sa barangay Lorega San Miguel nga nahinabi sa Banat News miingon nga taudtaod na silang nagduda kang Rafols. Matud niya midagan pa kini pagka-kagawad niadtong 2013 apan napildi.
“Wala na ko natingala kung ingon ana kadaghan nakuha sa iyaha, we have him in our radar for a while na,” sigun pa ni Herrera.
Gisuwayan pagkuha sa Banat News og habig si Rafols apan nagdumili na kini pakig-estorya. – /EIM) (BANAT NEWS)