Demolisyon nadayon apan nagkatensiyon

CEBU, Philippines - Diriyot na usab magkagubot ang gipadayong demolisyon sa mga informal settlers diha sa Sitio Mahayag, Barangay Subangdaku, siyudad sa Mandaue human nga mibabag ang mga residente sa demolition team.

Milanat pa og pila ka minutos una naguba sa demolition team ang nagpabiling barong-barong ni Adelaida Zuñiga tungod kay di g’yud kini motugot nga kini ipaguba.

Matud pa niya nga dunay mga sakit ang iyang mga apo ug wala na silay kapasilongan.

Apan bisan pa man sa paghangyo ni Zuñiga wala kini makapugong sa pagpatuman sa demolisyon.

Tungod niini, nipatunga na ang kapulisan sa hitabo ug gani lakip sila wala makalingkawas sa kasuko sa mga residente.

Si Alberto Lapesique sa City Legal Office sa Mandaue City Hall mipasabot nga wala silay gahom sa pagpahunong sa demolisyon tungod kay igo lang sila motuman sa mando sa ilang labaw.

Dugang ni Lapesique nga dugay ra nila  nga gihangyo ang mga residente sa Sitio Mahayag nga boluntaryong mamahawa apan sila maoy nagmagahi.

Naghilak ug mihangyo si Adelaida sa demolition team nga kun gub-on ang iyang pinuy-anan ihatod sila sa lungsod sa Tuburan aron didto mopuyo, apan wala siya paminawa.

Ang mga Zuñiga miingon nga wala g’yud sila makadawat og financial assistance gikan sa siyudad. Niadto pang buwan sa Oktubre gisugdan ang demolisyon apan tungod sa kagubot wala kini mahuman.

Ang mga residente nagtuo nga wala masulod sa 3-meter easement zone ang ilang mga balay, apan gihurot og guba ang kabalayan apil ang wala malakip sa court order. (BANAT NEWS)