CEBU, Philippines - Giinsister ni Bise Gobernador Agnes Magpale nga gihimo nila ang tanan aron ang mga biktima mahatagan og hinabang. Ang maong pamahayag maoy reaksyon ni Magpale kalabot sa reklamo sa mga biktima sa bagyong Yolanda nga wala sila makadawat og hinabang ilabi na ang housing materials.
“We have done our best, kung kuwang, sa ilang giingon dili man ta perfect,” ni Magpale pa.
Gibutyag ni Magpale nga ang kagamhanan sa probinsiya mihatag dayon kini og tag P2 milyones nga hinabang sa tulo ka lungsod sa amihanan.
Sila mismo ni Gobernador Hilario Davide III ang nangunay sa paghatud niini tulo ka adlaw human sa pagkuso-kuso sa bagyong Yolanda.
Ang gireklamo g’yud sa mga tawo mao ang Emergency Shelter Assistance (ESA) nga proyekto sa national government. Kadtong pamilya nga ang mga balay partially damaged makadawat og P10 mil samtang ang totally damaged makadawat og P30 mil nga hinabang.
Giangkon ni Magpale nga duna g’yuy mga lungsod nga wala pa gyud makadawat og hinabang apan dili kini sayop sa national government kondili sa ilang mga lokal nga opisyal nga maoy langay kaayo nga nakaduso sa listahan sa mga biktima nga angay tabangan. (BANAT NEWS)