Lalaki giluwaan, gidunggab
CEBU, Philippines - Usa ka lalaki ang gidunggab human giluwaan sa iyang silingan sa gawas sa gym sa sitio Million Flower, Looc, dakbayan sa Lapu-Lapu sa miaging Huwebes sa gabii.
Si Junbie Brigoli, 31-anyos, naka-angkon og samad dinunggaban gikan sa suspek nga si Justin Atay, 18-anyos.
Sa inisyal nga imbestigasyon ni PO2 Joseph Rouel Cutanda sa Lapu-Lapu City Police Office, nasayran nga samtang si Brigoli naglakaw padulong uli gikan sa haya sa iyang lolo, giluwaan ni Atay kinsa diha sa maong lugar. Ang biktima niduol sa suspek ug nakiglalis nga niresulta sa pagsinumbagay.
Ang suspek mihulbot og icepick sa iyang likod ug gidunggab sa makadaghang higayun si Brigoli sa walang dughan. Daling midagan ang suspek samtang gidala ang biktima sa Lapu-Lapu City District Hospital ug gibalhin sa Vicente Sotto Memorial Medical Center. (Christell Fatima M. Tudtud/GMR)(BANAT NEWS)
- Latest
