CEBU, Philippines - Nagpakamatay ang 25-anyos nga lalaki human giingong giaway sa iyang hinigugma sa sitio Camansi, Quiot, dakbayan sa Sugbo niadtong Miyerkules sa hapon.
Ang nagpakamatay naila nga si Juneil Encomio, ulitawo, kinsa giingong nakiglalis pa sa iyang uyab sa cellphone sa wala pa naghikog.
Ang igsuon nga si Jejomar ang nakadiskubre nga naghikog si Juneil pinaagi sa paghigot og electrical wire sa liog.
Sa lungsod sa Medellin, patay na usab nga nakit-an sa pamilya ang 34-anyos nga lalaki kinsa naghikog gamit ang cable wire sulod sa ilang balay sa barangay Lamintak Norte.
Ang nagpakamatay naila nga si Henry Noynay, minyo, kinsa nabantayan sa mga paryente nga kanunay lang magpuyo sulod sa balay ug magbasa og Bibliya sa wala pa nagpakamatay.
Nakuha sa kapolisan ang suicide note ni Noynay nga nangayo og pasaylo sa iyang gibuhat ug sa iyang pamilya.
Samtang gipaabot pa sa kapolisan ang mahimong resulta sa autopsy sa lawas sa usa ka Canadian nga nakit-an nga patay na sulod sa iyang giabangan nga balay ug wala’y sapot tibuok lawas sa Luyang, Carmen niadtong nakalabay nga buntag.
Ang langyaw naila nga si David Leslie Mortimer, 58, ulitawo.
Matud ni Insp. Ricardo Echavez, hepe sa kapolisan sa lungsod, nga usa ka Saturnina Sabayton nga nagpuyo sa maong lugar ang una nga nakabantay sa hitabo human nakapanimaho og isog nga baho ug dagku nga langaw sa diha’ng kini nagkabo og tubig duol sa gipuy-an sa langyaw.
Sa ilang pagsubay ilang nakita si Mortimer nga naglingkod sa bangko nga hubo ug paingon na sa pagkadugta.
Wala’y nabungkag sa mga gamit sa langyaw sulod sa balay ug gidudahan nga namatay kini sa balatian apan ang nakapaduda kun ngano nga naghubo.
Ulahing nabantayan nga buhi ang langyaw duha ka adlaw na ang nakalabay human kini migawas sa balay kay nagpalit og ilimnong makahubog samtang kini nag-inusara’ng nagpuyo sa balay. Gihuwat pa ang resulta sa autopsy nga gihimo sa Scene of the Crime Operative sa probinsiya. (BANAT NEWS)