Kanhi maestro gipusil sa amahang pastor

CEBU, Philippines - Kanhi maestro sa usa ka public school sa Barangay Punta Engaño dakbayan sa Lapu-Lapu ang gipusil sa iyang amahan nga pastor kagahapon sa udto.

Ang biktima mao si Lemuel Osorio, 33, minyo apan buwag sa asawa ug residente sa Sitio Buot sa maong barangay kinsa napusilan sa iyang buko-buko.

Ang suspek mao ang iyang amahan nga si Seferino Osorio, 66, usa ka pastor sa Christ Based Learning and Community Church sa mao nga barangay.

Matud pa nasuko ang suspek human naabtan ang anak sa sud sa iyang balay nga unta iyaha man kining gikandadohan. Matud pa nagumon sa drugas ang anak ug magsige panghilabot sa iyang mga gamit.

Nagkakomprontase ang duha hinungdan nga napusilan kini sa pastor. Ang anak kusganong mihimakak  nga nangawat sa amahan ug di siya tiggamitan og drugas. (BANAT NEWS)