CEBU, Philippines - Nagtinguha ang Kapitolyo nga mamalit og mga bag-ong heavy equipment hulip sa mga karaan ug gubaon na.
Ang Provincial Engineering’s Office niduso og P79 milyones nga gahin alang sa sunod tuig diin nalakip niini ang ipalit sa maong mga heavy equipment.
Matud ni Provincial Engineer Hector Jamora nga sa pagka-karon ang Kapitolyo adunay tulo ka dump truck apan usa niini gipaayo pa.
Adunay usa ka mini-dump truck nga toa sa Camotes gigamit sa proyekto sa probinsiya samtang sa unom ka grader, upat lang ang magamit.
Kini atoa sa lungsod sa Pilar, isla sa Bantayan, lungsod sa Daanbantayan ug dakbayan sa Toledo.
Ang probinsiya adunay bulldozer apan gubaon.
Kasamtangang gigamit nga mga heavy equipment mao ang upat ka roller, usa ka payloader, duha ka boomtruck, prime mover ug duha ka water truck.
Matud ni Jamora nga ang probinsiya nagkinahanglan og duha ka sets sa heavy equipment nga langkuban sa bulldozer, backhoe ug roller. (BANAT NEWS)