Gidaghanon sakyanan paminusan

CEBU, Philippines - Nagtinguha si Bokal Thadeo Ouano nga makunhuran ang gidaghanon sa mga sakyanan.

Awhagon ni Ouano ang Land Transportation Office (LTO) ug Land Transportation Franchising and Regulatory Board (LTFRB) sa pagtuon og pamaagi nga mapakunhod ang gidaghanon sa mga sakyanan sa tanang siyudad sa nasud.

Usa sa sugyot ni Ouano mao ang pagwagtang sa mga karaang sakyanan o pagbutang og limit sa “vehicle ownership” aron masulbad ang kahuot sa dagan sa trapiko sa kadalanan  ug ang problema sa nagkagrabeng polusyon.

Gihimug-atan ni Ouano ang prinsipyo sa estado sa pagprotekta sa katungod sa katawhan alang sa balansi ug himsog nga palibot.

Iyang gisanglitanan ang Environment Code of Cebu nga iyang gipangamahanan nga nagdeklarar kabahin sa palisiya sa pagmintinar sa limpiyong hangin ug tubig alang sa maayong panglawas sa mga molupyo.

Kini nagkinahanglan sa hiniusang paninguha sa  probinsiya, mga dakbayan ug kalungsuran lakip na ang mga ordinaryong molupyo nga makiglambigit sa pag-regulate ug pagkunhod sa ilang kontribusyon sa polusyon sa tubig ug hangin.

Usa sa natuki atol sa Clean Air Summit sumala pa ni Ouano mao ang sugyot ni DENR Secretary Ramon Paje nga kinahanglang pakunhuran ang gidaghanon sa mga motor vehicles. Matud ni Ouano nga naobserbahan nga nagpadayon og saka ang gidaghanon sa mga motor vehicles sa tibuok nasud lakip na sa probinsiya sa Sugbo diin nakahatag kini og kagrabeng kahuot sa trapiko ug daku usab kini og natampo sa polusyon.

Dugang ni Ouano nga nagkihanglan og “concrete action plan” aron masulbad ang problema sa kahuot sa trapiko sa mga siyudad ug sa air pollution nga maoy usa nga hinungdan sa sakit sa mga molupyo. (BANAT NEWS)