CEBU, Philippines - Kapin sa 2 mil ka senior citizens gikan sa nagkalain-laing barangay sa lungsod sa Samboan ang nakadawat og mga hinabang gikan sa probinsiya ug lokal nga kagamhanan sa lungsod kaniadtong Martes.
Ang mga senior citizen nga nakapahimulos sa “Halad alang kang Lolo ug Lola” nga programa sa Kapitolyo ug lokal nga kagamhanan sa lungsod nakadawat og bugas, delata nga pagkaon, noodles, vitamins ug P500.
Ang Kapitolyo maoy mihatag sa mga bugas ug vitamins samtang ang mga delata ug noodles gidonar ni Kongresista Wilfredo Caminero sa ikaduha’ng distrito ug ang ‘tag P500 gikan sa lokal nga kagamhan sa lungsod.
Ang pagpang-apud-apod og hinabang gipahigayon sa covered court sa Samboan nga gitambongan nila ni Gobernador Hilario Davide III, Bise Gobernador Agnes Magpale ug Mayor Raymond Calderon. (BANAT NEWS)