Nipakatap og pekeng P1,000 nadakpan

CEBU, Philippines - Lalaking nipakatap og mga peke nga P1,000 sa Cordova nadakpan sa mga estambay sa Barangay Ibabao sa maong lungsod.

Si Police Officer 2 Vilma Degamo sa Cordova Police Station miila sa nadakpan nga si Rubi Mart Gaviola, taga Barangay Tejero, Dakbayan sa Sugbo.

Matud pa ni Degamo nga nadakpan si Gaviola human moreklamo ang magtiayong Jimmy ug Ailyn Sismar nga gipalitan sa suspek og usa ka kahang sigarilyo gamit ang peke nga P1,000. Apan samtang nag-andam sa sensilyo, nakamatikod sila nga peke ang maong salapi apan nakabantay usab ang suspek nga mopalag ang tag-iya sa tindahan ug mikaratil kini og balik sa gipapaabot niya nga taksi ug gimandoan pagbiya sa lugar.

Demalas ang suspek tungod kay nakabantay ang mga estambay ug gigukod ang taksi aron babagan. Dihadiha gidakop sa mga tawo si Gaviola ug gi-turnover sa mga polis.

Diha sa presinto, usa ka Mary Ann Cañete, 26, taga  Barangay Pilipog sa  mao gihapong lungsod ang misumbong nga gibayran sila og peke nga P1,000 sa usa ka lalaki sa gipalit niini sa ilang tindahan. Tungod niini, gipatan-aw kang Cañete si Gaviola nga natanggong sa karsel ug positibo niya kining gitumbok nga mao ang lalaking mibayad kanila og peke nga kwarta.

Midugang usab si Degamo nga paglabay sa pipila ka oras, nag-abot-abot ang mga drayber sa taksi nga positibo usab nga mitumbok kang Gaviola nga miplete kanila og peke nga P1,000.  (BANAT NEWS)