Mga batan-on gipaulanan og bala, usa naangol

CEBU, Philippines - Grabeng naangol ang usa ka minor de edad nga lalaki nga biktima sa pagpamusil sa laing duha ka minor de edad nga nagsakay og motorsiklo sa Sitio Sun-ok, Barangay Tayud, Lungsod sa Consolacion.

Si Police Officer 3 Norberto Cejas sa Consolacion Police Station miingon nga usa ka 15-anyos nga taga Redwood Subdivision, Barangay Tayud sa nahisgotang lungsod ang napusilan.

Matud pa ni Cejas nga naglakaw ang biktima kuyog sa iyang mga barkadang mga kaedad niini dihang kalit silang gilabyan sa motorsiklo ug gipamusil sa backrider niini.

Maayong pagkaigo sa bukton sa biktima ug nagkatibulaag iyang mga kauban. Matud pa nga mga menor de edad usab ang mga namusil kanila.

Gisusi karon ang panagribal sa mga gangs sa mga batan-on sa maong dapit. (BANAT NEWS)