Libre’ng rehIstro sa mga anak sa Badjao

CEBU, Philippines - Ang Department of Social Welfare and Development (DSWD) nagpasiugda karon og libre nga birth registration alang sa mga Badjao nga ania dinhi magpuyo sa dakbayan sa Sugbo.

Si DSWD-7 social worker Angelina Paghubasan mipasabot nga ang tinguha nila nga marehistro ang mga Badjao gitumong aron makakuha sila sa mga benepisyo gikan sa kagamhanan.

Matud ni Paghubasan nga ang duha ka adlaw nga pagsaulog sa Indigenous People’s Day-Free Birth Registration for Sama-Badjao Children gipahigayon kagahapon ug karong adlawa.

Pinaagi sa mao nga programa ang mga anak sa Badjao makakuha na og live birth o birth certificate nga kinahanglan nila sa ilang pagtungha ug makapahimulos na sila og benepisyo sama sa ubang kabataan.

Dugang ni Paghubasan  nga karong adlawa adunay free medical mission alang sa mga bata ug sa ilang mga ginikanan, ilabi na sa mga hamtong nga nanginahanglan og eyeglasses.

Si Gemma Bermoy sa Department of Interior and Local Government (DILG) miingon nga sagad sa mga anak sa Badjao walay live birth nga gikinahananglan sa ilang pag-eskuwela.

Si Susan Gabiola, 44, usa ka Badjao ug taga Sitio Alaska, Mambaling, miingon nga nalipay ug nagpasalamat sila sa kagamhanan nga mitabang kanila pagparehistro sa ilang mga anak.(Sheilame Medil USJ-R Masscom Intern/RUB)(BANAT NEWS)

Show comments