CEBU, Philippines - Mga biktima sa bagyong Yolanda sa Barangay Gibitngil, lungsod sa Medellin nga gitawag og Alliance of Yolanda Survivors United for Development and Assistance mimartsa ug nag-rally atubangan sa Kapitolyo kagahapon sa hapon ug gipaningil ang mga hinabang nga alang unta kanila. Si Jocelyn Rosatase, taga Gibitngil, Medellin miingon nga hangtud karon pipila lang ka kilo nga bugas ug numero kwatro nga lansang ang ilang nadawat gikan sa gobiyerno.
Base sa talaan sa Cebu Provincial Disaster Risk Reduction Management Office nga mikabat ngadto sa 102,404 ka balay ang naguba sa amihanang bahin sa Sugbo sa pagkusokuso ni Yolanda usa ka tuig na ang nakalabay. Ang Department of Social Welfare dunay programa nga Disaster Assistance Family Access Card (DAFAC) nga miadto sa ilahang dapit ug gipasuwat sila og card nga ang katunga gipahipos kanila nga mao kunoy ilang claim card sa mga programa sa DSWD.
Apan paglabay sa pipila ka adlaw gipanguha ang kaputol sa cards ug hangtud karon wala na kini mabalik kanila hinungdan dili sila maka-claim og hinabang. Sumala pa nga sa DAFAC kadtong mga balay nga partially ug totally damaged hatagan gikan P30,000 ngadto sa P70,000 apan hangtud karon wa silay nadawat.
Si Rosatase kinsa dunay tulo ka mga anak nagpasalamat sa non-government organization (NGO) nga wa mobiya pagtabang sa ilang lugar nga maoy nanghatag kanila og mga relief goods sama sa pagkaon. Laing biktima nga si Roxan Ancajas mipasangil nga pinili ra ang gipatrabaho sa “cash for work,” pinili ra usab ang gipanghatagan og pumpboats ug sakayan panagatan, nga unta sila lehitimo man sila nga mananagat sa ilang dapit.
Way bisan usa ka opisyal sa Kapitolyo ang miatubang kanila sanglit si Gobernador Hilario Davide III atoa sa dakbayan sa Bogo alang sa anibersaryo sa pag-igo sa bagyong Yolanda. Apan una na siyang namahayag nga ang tanang mga donasyon gikan sa international organizations nga miagi sa kagamhanan sa probinsiya nahatag na.
Matud niya P80 milyones nga kantidad sa mga hinabang nga nahatag ngadto sa mga biktima. Ang P18 milyones niini gikan sa mga donasyon sa mga NGOs ug P62 milyones ang gikan sa probinsiya. Andam usab siya nga mohatag sa kopya sa liquidation sa mga hinabang kung ugaling dunay interesadong mangayo niini. (Brenda D. Batuto/EIM)(BANAT NEWS)