Special reports sa Yolanda bag-ong paglaom human sa Yolanda
CEBU, Philippines - Ang isla sa Camotes usa sa mga lugar nga wala makalingkawas sa kabangis sa bagyong Yolanda dihang miigo kini sa Sugbo niadtong Nobiyembre 8 sa miaging tuig.
Apan bisan pa man sa makalilisang nga kasinatian wala mawagtangi og paglaum ang mga molupyo sa isla.
Sama na lang niining mga tinun-an sa Skills Training and Livelihood Assistance (STLA) nga programa sa Technical Education Skills Development Authority (TESDA) nga migradwar kagahapong adlawa sa ilang tagsa-tagsa ka mga vocational course.
Dul-an sa usa ka libo ka mga tinun-an ang migradwar ug midawat sa ilang national certificates nga gitunol mismo ni TESDA Secretary Joel Villanueva.
Kung kaniadto dili makita ang kalipay sa ilang panagway gumikan sa nahitabo apan karon wala ikatago sa mga tinun-an ang ilang dakong kalipay ug pagpasalamat gumikan sa bag-ong higayon nga gihatag alang nila.
Usa sa mga nakabenepisyo sa programa sa TESDA mao si Grace Canubas nga nagkuha og Household Services NC-II. Usa sila sa mga survivors kansang mga balay napapas sa bagyo.
Matud pa ni Canubas nga iyang paninguhaong makatrabaho siya gawas sa Pilipinas gamit ang nakat-onan aron matabangan iyang pamilya.
Ang coordinator sa STLA nga si Marcial Mechavez miingon nga nagsugod ang ilang training program niadtong buwan sa Hulyo nga naglakip sa welding, masonry, carpentry, plumbing, pipe fitting, housekeeping, house services ug food and beverage.
Tabangan usab sa TESDA ang mga nakahuman nga makasud og kompanya alang sa ilang on the job training ug lakip na usab ang pagpangita og trabaho. (Decemay Padilla/EIM)(BANAT NEWS)
- Latest
