Dredging sa Tipolo ug Mahiga Creek

CEBU, Philippines - Ang Department of Public Works and Highways (DPWH) maoy mopatrabaho sa pagpalawom sa Mahiga Creek ug Tipolo Creek pinaagi sa paghabwa sa mga sagbot ug lapok sa mao’ng mga sapa.

Si Engineer Myrna dela Serna nga maoy project engineer sa 6th Engineering District sa DPWH 7 miingon nga paninguhaon nila nga mapadali ang pagpalawom sa maong duha ka sapa.

Gitataw ni Engineer Dela Serna nga nangayo na sila’g pagtugot sa Department of Environment and Natural Resources (DENR)-7 pinaagi sa pagkuha og Environmental Compliance Certificate (ECC) alang sa maong proyekto. Ang DPWH-7 migahin og P44.5 milyones alang sa pagpalawom sa Tipolo Creek ug P44.6 alang sa Mahiga Creek dapit sa Barangay Subangdaku.

Giklaro ni Dela Serna nga ang Mahiga Creek maoy ilang unahon pagtrabaho ug dayon isunod usab ang pagpalawom sa Tipolo Creek nga adto magsukad sa bukana sa Mactan Channel. Adunay plano nga ang mga lapok nga hinabwa gikan sa sapa adto itam-ok sa unom   ka ektarya nga relocation site sa Mandaue nga nahimutang sa Barangay Paknaan. Si Mandaue City Planning Officer Florentino Nimor miingon nga himoan nila og pakisusi ang mga lapok nga mahabwa sa Tipolo Creek ug Mahiga Creek kun magamit ba kini nga iabuno sa mga tanom. (BANAT NEWS)