City Hall ibaligya

CEBU, Philippines - Gisugyot ni Toledo City Mayor Sonny Osmeña nga ibaligya ang karaang City Hall nga nahimutang daplin sa dagat. Nipadala og suwat-hangyo si Osmeña ngadto sa konseho nga uyonan ang iyang tinguha pagbaligya sa karaang City Hall ug pipila ka laing mga kabtangan sa dakbayan.

Giawhag ni Osmeña ang mga konsehal nga unta mohimo sila og resolusyon ug ilang aprobahan ang pagbaligya sa maong mga kabtangan.

Ang karaang City Hall maoy nahimutangan sa City Health, City Assessors office, Police Headquarters, Bureau of Fire Protection  (BFP) ug uban pa.

Tumong ni Osmeña nga ang halin sa mao nga kabtangan gamiton pagpanindot sa dakbayan. Tun-an pa hinuon sa committee on laws ug committee on properties management ang mao nga isyu. (BANAT NEWS)