CEBU, Philippines - Tungod sa nahitabong sunog sa Cebu Doctors University Hospital buot karon ni Konsehal Dave Tumulak nga ang tanang pangpubliko ug pribadong tambalanan sa dakbayan sa Sugbo ang mogama og Emergency and Disaster plans. Buot ni Tumulak nga makakuha og kopya niini ang Cebu City Risk Reduction Management Council (CCDRRMC) aron mosusi ug mahimoan og rekomendasyon.
Kahinumdoman nga kapin sa 200 ka mga pasyente ang gibalhin sa lain-laing mga tambalanan human niulbo ang sunog sa ground floor sa maong tambalanan. Ang pagkasunog sa maong tambalanan naghatag og dakong kahadlok sa mga pasyente ug ubang mga tawo sulod sa edipisyo.
Tungod sa maong mga panghitabo naaghat sa konseho pag- check sa kaandam sa mga tambalanan pag-evacuate sa ilang mga pasyente kun may emerhensiya. (BANAT NEWS)