CEBU, Philippines – Ang Cebu City Environmental Sanitation Enforcement Team (CESET) nakadakop og 678 ka mga tawo nga nasakpan nga nanigarilyo ug nagpataka og labay og basura sa pag-obserbar sa All Saints’ ug All Souls’ Day.
Lakip sa mga nadakpan ang tulo ka mga opisyales sa nagkalain-laing barangay sa siyudad sa Sugbo.
Gihinganlan ni Grace Luardo ang mga konsehal sa barangay nga silang Alan Dilao sa Barangay Pari-an, Roberto Camu sa Barangay Guadalupe, ug si Dindo Nuñez sa Barangay Tejero.
Sigon ni Luardo nga silang konsehal Dilao ug Camu misaad nga makig-areglo sa iyang opisina apan si Nuñez matud pa ni Luardo nangisog dihang giisyuhan og citation ticket ug nagdumili pagdawat niini.
Sa pakighinabi sa Banat News ni Nuñez, iyang gihimakak nga nangisog siya sa usa ka barangay environmental officer kay miesplikar lang siya niadtong panahona. Gisaway niya ang matud pa gagmay nga mga “no smoking” signages sa lugar apan misaad siyang makig-areglo siya sa opisina sa CESET karong adlawa.
Giawhag ni Luardo ang ubang nangadakpan nga i-settle daan ang ilang multahanan nga P1,500 sa manigarilyo ug P500 sa nagpataka’g labay og basura aron di sila makasohan ngadto sa korte. – /EIM) (BANAT NEWS)