CEBU, Philippines – Namatay ang usa ka 6-anyos nga batang lalaki nga gianod sa kalit nga pagdako sa bul-og sa tubig sa sapa nga iyang giduwaan kagahapon diha sa Barangay Lutac sa dakbayan sa Naga.
Sumala pa ni Rey Mantalaba, sa Naga Emergency Assistance Team (NEAT) nga ang maong bata naila nga si Dave Alferez, molupyo sa samang barangay.
Si Mantalaba nga nahinabi sa Banat News miingon nga nakadawat sila og alarma gikan sa kapitan sa Lutac nga si Eleazar Gesman nga naghangyo sa ilang tabang.
Mipadala dayon og search and rescue team ang City Disaster Risk Reduction Management Office nga naglangkob sa 30 ka tawo ug gisubay ang sapa.
Tanang mga barangay nga naagian sa sapa gi-alerto gilayon sa CDRRMC aron monitoron ang tampi sa ilang mga sapa.
Pasado alas-4 kagahapon sa hapon na napalgan ang bata didto na sa kadagatan dihang kini nabangalan sa usa ka mananagat .
Sumala pa nga naputos og mga garas-garas ug samad sa ulo ug kalawasan ang bata.
Matud pa ni Mantalaba iyang bana-bana nga mosaylo sa pito ka kilometro ang naanoran sa bata.
Si Mantalaba miingon nga base sa pamahayag sa ig-agaw nga gibilin ang bata sa iyang mga ginikanan ngadto sa apohan nga ang balay nahimutang sa kilid sa sapa. Nagduwa ang maong bata apan nahulog ang iyang tsinelas sa sapa mao nga iya kining gigukod apan wala damha nga naabtan siya sa kusog nga bul-og sa tubig baha gikan sa bukid hinungdan nga naanod padung sa dagat. – /EIM) (BANAT NEWS)