Babaye natagak sa motorsiklo patay

CEBU, Philippines - Patay diha-diha ang 45-anyos nga babaye nga natagak sa gisakyan nga motorsiklo nga gimaneho sa iyang bayaw sa sitio Tipolo, Sanlagan, Badian sayo sa buntag sa nakalabay nga adlaw.

Ang biktima naila nga si Juana Abestano, minyo nga mag-uuma samtang ang drayber sa motorsiklo mao si Paul Celestial, 29, pareho nga nagpuyo sa maong lugar.

Matud ni SPO1 Andrew Canonigo, desk officer sa Badian Police, nga paingon unta mag-deliver sa iyang gipang-ani nga batong ang duha sakay sa motorsiklo.

Sa likod sa drayber dunay tulo ka sakong batong ang gihigot ug ang biktima sa tangki sa motorsiklo atubangan sa drayber na naglingkod.

Gumikan sa kadanglog sa dalan human sa uwan, naglisod ang drayber sa pagmaneho ug kalit lang nahagbong ang biktima ug napantok ang ulo niini sa crank starter sa motorsiklo ug naguyod sa dalan. Ang grabeng bun-og sa iyang ulo ang hinungdan nga nakabsan sa iyang kinabuhi ang biktima.

Apan gipasabot ni Canonigo nga dili na interesado nga mopasaka og kaso ang pamilya sa namatay.

Gani didto na ang pamilya sa namatay sa buhatan sa kapolisan ug giawhag ang mga polis nga pagawson na lang ang drayber. (BANAT NEWS)