CEBU, Philippines – Gimandoan sa Cebu Provincial Police Office ang hepe sa Argao Police nga pahatagon og suwat tubag nganong wala kini nakapahibawo kaniya labot sa mga estudyante nga gisudlan og dautang espiritu niadtong Lunes.
Matud ni CPPO Director, Sr. Supt. Noel Gillamac, nga kinahanglan siya pahibaw-on sa matawag og “significant event” sa usa ka lugar dili pinaagi sa media.
Si Insp. Alejandro Batobalonos, hepe sa Argao Police nga nahinabi sa Banat News, mitug-an nga andam siya motuman sa mando ni Gillamac.
Alang kang Batobalonos gamay lang kadto nga hitabo sanglit pag-abot nila sa lugar nikalma na ang sitwasyon.
Samtang hangtud karong adlawa wala pa nabalik ang klase sa pribadong tunghaan sa high school diin unom ka estudyante ug usa ka maestro ang giingong nasudlan og dautang espiritu .
Matud ni Lamacan barangay kapitan Modesto Villaruel nga nahukman nila kagahapo’ng adlawa kauban sa tagdumala sa Argao Center for Science Learning Inc., ang pagsuspenso sa klase aron mahatagan og pahuway ang mga biktima.
Sa petsa 5 pa sa Nobiyembre mobalik ang klase sa maong tunghaan. – /GMR) (BANAT NEWS)