Estatuwa nila’ng Serging ug Don Vicente buksan na

CEBU, Philippines - Buksan na karong buntag ang bag-ohay pa lang nga gipabarug nga monumento nila ni kanhi Senador Serging Osmeña ug Don Vicente Rama nga anaa atubangan sa City Hall.

Ang pagpabarug og monumento sa duha ka ilado nga Sugboanon maoy pagpasidungog kanila kay si Don Vicente maoy nakapahimo nga siyudad sa Sugbo samtang si Serging maoy una nga elected mayor diha nga nahimo na nga dakbayan ang Sugbo.

Si Don Vicente maoy apohan ni Mayor Michael Rama samtang si Serging amahan ni kanhi kongresista Tomas R. Osmeña. Si Mayor Rama maoy mihangyo sa kadagkoan sa Insular Life Assurance Company nga patukoran og bronse nga estatuwa sila si Serging ug si Don Vicente.

Si kanhi kongresista Osmeña miingon nga dili siya motambong sa ipahigayon nga “unveiling” sa estatuwa nila ni Don Vicente ug sa iyang amahan nga si Serging.

Matud ni Tommy nga nakasabot siya nga gigamit ra ni Mayor Rama ang iyang amahan nga giapil sa pagpahimo og estatuwa aron nga dili kaayo ngil-ad nga ang bantayog ra sa iyang apohan maoy magbarug sa atubangan sa City Hall. Alas dies karong buntag, himuon ang pag-unveil sa duha ka bronse nga estatuwa.

Si kanhi kongresista Osmeña mopatawag og press conference karong udto aron mohatag siya og dugang pamahayag bahin niini’ng mao nga isyu.  (BANAT NEWS)