Taga Mahusay nangguba sa ilang panimaye

CEBU, Philippines - Boluntaryong niguba sa ilang panimaye ang mga molupyo dihang gisugdan kagahapon sa buntag ang pagdemolis sa dul-an 200 ka pamilya sa sitio Mahusay, Subangdaku, siyudad sa Mandaue.

Wala’y reklamo nga nadungog gikan sa mga molupyo ang tigpatuman sa demolisyon ug gani mismo ang mga tagbalay ang mihangyo nga sila na ang moguba sa ilang kabalayan.

Matud ni Roger Paller, ang Public Information Officer (PIO) sa kagamhanan sa dakbayan sa Mandaue, nagkanayon nga gituman lang sa mga residente ang ilang gikasabutan sa miaging Domingo nga sila lang ang moguba aron magamit pa nila ang mga materyales nga ilang balhinan. Si Paller miingon nga giabagan sa kagamhanan ang mga residente sa ilang pagbalhin sa relocation site nga 6.5 ka ektaryang luna sa barangay Paknaan.

Usa ka Dante Pepito kinsa 25 ka tuig na nga nagpuyo duol sa tulay nga sukad sa iyang pagpuyo sa lugar wala sila nakasinati og pagbaha apan andam sila motuman sa balaud.

Apan ang  sitio Mahayag diin ang mga balay gi-demolis sa miaging semana ang nipahigayon og picket rally ug nibahad nga maghimo sila og tent city sa lugar hangtud nga dili mahatag kanila ang ilang mga demanda.

Matud sa pangulo sa asosasyon, Ester Diaz, nga wala sila’y nadawat nga financial assistance gikan sa kagamhanan sa siyudad, buot usab nila nga mabalik ang ilang mga gipangbayad ngadto sa kanhi presidente sa ilang asosasyon kinsa ni-avail sa relocation site sa Paknaan. Lakip sa nitambong sa picket si Teody Navea, ang secretary-general sa Sanlakas-Cebu nitug-an nga ang himuong tent city sa sitio Mahayag molungtad hangtud na sa Pasko kun di dunggon ang ilang yangungo.

Kini sama sa on-site relocation, financial assistance ug dialogue uban kang Mayor Jonas Cortes nga pasiugdahan sa simbahan ug panawagan ngadto sa nasudnong kagamhanan pag-intervene sa ilang problema.

Atol sa demolisyon, usa sa nitan-aw kun hapsay nga gihimo ang demolisyon mao ang pangulo sa Department of Social Welfare and Development (DSWD) Mandaue City, nga si Violeta Cavada, kinsa nitug-an nga kun magtukod og tent city ang mga taga Mahayag, ipaguba ra gihapon nila kini.

Iya usab gipasabot nga kadtong wala nakadawat sa ilang mga financial assistance mao kadtong wala niduso sa mga rekisitos.

Nangapod-apod na ang DSWD og mga food packs sa mga apektadong pamilya alang sa ilang pagkaon sulod sa tulo ka adlaw. (BANAT NEWS)