Aksidente sa motor duha ang patay

CEBU, Philippines - Duha ang patay ug tulo ang naangol sa duha ka managlahing aksidente sa kalsada sa dakbayan sa Sugbo ug sa Naga.

Duha ka motorsiklo ang nagsungag diha sa  V. Rama Avenue ning dakbayan, diin usa sa mga drayber sa motorsiklo ang namatay nga giilang si Clifford Galvez, 40, taga Casuntingan, Mandaue City.  Samtang naangol ang backrider niini nga si Pablo Layos nga taga Punta Princesa ug kritikal ‘sab ang drayber sa gikabangga niini nga motorsiklo nga si Mark Lloyd Sajolan, 35, ug angol ‘sab ang back rider niini nga si Rodante Tagsip, 37, taga Suba, Cebu City. Sa imbestigasyon sa traffic division sa City Traffic Operations Management nasayran nga nagsugat g’yud ang duha ka motor tungatunga sa dalan.

Daling gidala sa Cebu City Medical Center (CCMC) ang mga biktima apan nakabsan gayud sa kinabuhi si Galvez.

Samtang sa dakbayan sa Naga, patay ang usa ka drayber sa motorsiklo human nabanggaan sa Fuso Fighter truck samtang kini nag-parking sa kilid sa dalan sa Barangay Inayagan sa mao’ng siyudad.

Giila ang biktima nga si Joselito Villarin, taga lungsod sa Minglanilla samtang naila ang drayber sa cargo truck nga si Josever Despi, nga taga lungsod sa Ronda. Giingong wala makabantay si Despi nga dunay naghunong nga motorsiklo sa iyang agianan. Nasuta nga wala nagsiga ang signal lights sa biktima.

Si PO1 Jean Paul Mag-aso sa Naga City Police nga nahinabi sa Banat News   mitug-an nga hangtod sa pagkutlo niini nga balita wala pay sakop sa pamilya sa namatay ang miadto sa ilang buhatan alang sa posibling pag sabot-sabot.  (BANAT NEWS)

Show comments