Yellow Taxi exempted sa EAD

CEBU, Philippines - Ang Land Transportation and Franchising Regulatory Board (LTFRB)-7 mihatag og exemption sa mga sakop sa Cebu City Airport Taxi Operators Incorporated (CCATOI) o Yellow Taxi pagbutang og emergency assistance device ibabaw sa ilang mga yunit. Matud ni LTFRB regional director Ahmed Cuizon nga kining 120 ka yunit nga tourist metered taxi limitado lang sa mga pasahero nga gikan sa airport hangtod sa nagkadaiyang mga lugar sa Sugbo.

Nagpasabot kini nga naggikan na kini sa makuti nga security check ang mga pasahero sa sud sa airport. Dugang niya nga dili usab mo-pickup  ang maong mga taksi og mga pasahero padung sa airport. Ang rekomendasyon sa LTFRB miguwa human mi-request ang CCATOI sa Cebu City Council ug sa City Traffic Operations Management nga ipa-exempt sila sa City Ordinance 1975 kon sa pag-install og emergency assistance device (EAD) sa ibabaw sa taxi unit aron pasigahon kun dunay emerhensiya sa sulod sa sakyanan. Matud sa CCATOI, ang Department of Tourism ang nagkontrol kanila kay mas limpyo kini pagkaatiman ug presentable itandi sa ubang taksi. Wala pay bisa’g usa nga insidente sa pagpanulis ug pagpangawat ang nahitabo sa ilang operasyon sulod sa unom ka tuig.

Ang CITOM unang mipagawas sa ilang habig nga dili nila kontrolado ang exemption nga gipangayo sa maong kompanya kay igo lang silang nag-enforce sa balaod nga gipasa sa konseho sa Sugbo.

Matud ni CITOM executive director Rafael Yap nga tun-an usa nila ang rekomendasyon sa LTFRB.  (BANAT NEWS)