Talisay naglisod pasweldo sa JOs?
CEBU, Philippines - Gihimakak ni Talisay City Mayor Johnny De los Reyes nga nabangkarota na ang dakbayan sa Talisay hinungdan nga nadelatar ang sweldo sa mga Job Orders sa siyudad.
Ang sweldo ihatag kada petsa 5 ug 20 apan nidagan pa og mga pila ka adlaw nga gipapaabot sa sweldo ang kapin 1,300 ka mga JO’s.
Apan giklaro ni De los Reyes nga naa na ang kwarta alang niini apan wala pa lang gipangapod-apod sa city treasurer.
Gipasabot usab ni De los Reyes nga kuwang og gamay ang kwarta sa dakbayan apan iyang giklaro nga wala pa niabot sa punto nga wala nay kapasidad ang dakbayan sa pagpasweldo sa mga job orders.
Daghang mga JO’s ang nagyawyaw sa miaging semana human nga nilapas na sa petsa 20 apan wala pa ilang sweldo. Gibasol ni De los Reyes si City Treasurer Emma Macuto nga maoy nakaingon niini.
Apan si Macuto miklaro nga Huwebes na sa hapon naabot ang kwarta ug kinahanglan pa nila isulod sa sobre hinungdan nga Biyernes na nila nahatag ang sweldo.
Ang mayor nagtinguha karon nga pahulipan si Macuto tungod sa pasangil nga dili kini epektibo sa iyang trabaho. (Khacel Anne Diel Sanchez/EIM)(BANAT NEWS)
- Latest
