Nganong maghalad og pagkaon sa minatay?

CEBU, Philippines – Nahimo na nga sulondong kinaiya sa Filipino panahon sa pagsaulog sa adlaw sa mga kalag ang pag-andam og nagkadaiyang matang sa mga bulak ug lamian nga mga pagkaon.

Kini dili lang para sa mga buhi, kondili hasta sa mga minahal nila sa kinabuhi nga mitaliwan na.

“Ang paghalad nasunod na sa panahon pa sa katigulangan,” pamahayag pa ni Nang Benigna Recta, lumad nga taga lungsod sa Tuburan.

Matud pa niya, gawas sa mga bulak magdala usab sila og mga giluto nga pagkaon nga kinaham sa sakop sa pamilya sa namatay sa buhi pa kini.

“Sama sa akong Lolo Tomas nga kinaham niya ang giun-onan nga bulinaw nga giputos sa dahon sa saging mao say among dad-on ug among ibutang sa ibabaw sa iyang lubong isip among halad niya,” dugang pa ni Nang Bening.

Si Lolo Tomas natawo panahon pa sa Katsila ug namatay siya niadto lang 1999.

Sa bukirang bahin sa dakbayan sa Sugbo makita ang lapad kaayong tanaman sa nagkadaiyang matang sa bulak. Ang mga okasyon sama sa kalag-kalag maoy panahon nga kusog kaayo ang negosyo.

Apan bisan dunay pagduhaduha sa kapuslanan niini tungod kay dunay miingon nga wa man kini hilig sa minatay sa buhi pa sila, apan nadala gihapon kini uban sa pagdagkot og kandila isip tradisyonal nga halad.

Diha usab sa sam-ang salohan sa pamilya ang giluto nga pagkaon sama sa budbod, bibingka ug uban pa aron ‘dungan’ silang mangaon uban sa ilang mitaliwan nang minahal sa kinabuhi. – /EIM) (BANAT NEWS)