CEBU, Philippines – Nagsugod na sa ilang preparasyon ang kapolisan ug traffic management sa dakbayan sa Lapu-Lapu nunot sa nagsingabot nga pagtimaan sa Kalag-Kalag karung Nobiyembre 1 ug 2 niining tuiga.
Kini maoy gibutyag ni Police Senior Superintendent Armando Radoc, Office-in-charge sa Lapu-Lapu City Police Office ug ni Frank Brazil, hepe sa City Traffic and Management Services sa dakbayan.
Si Radoc nagkanayon nga seguridad sa katawhan ang hatagan nila og pagtagad aron hapsay ang pagbisita sa mga tawo nga moduaw sa mga sam-ang sa siyudad.
Adunay tulo ka sam-ang ang siyudad, kini mao ang Mactan Island Memorial Garden sa Barangay Maribago, Municipal Cemetery sa Sitio Tugas, Barangay Gun-ob, ug Humay-humay Cemetery. Aduna usab sementeryo sa isla sa Olango nga apil sa bantayan sa kapolisan.
Si Brazil sa iyang bahin miingon nga alas-4 sa kaadlawon sa Nobiyembre 1 pasirad-an na ang dalan padung sa pangpublikong sementeryo ug ablihan lang kini ini og Nobiyembre 2 sa tungang gabii. Kadtong magdala og mga sakyanan adto lang maka-parking duol sa Hoopsdome, Barangay Gun-ob.
Samtang si Radoc miingon nga ilahang tagaan og konsiderasyon ang mga persons with disabilities nga adunay pribadong mga sakyanan ang pwede makasulod sa mga "no entry" nga mga kalsada apan ipa-drop off lang sila sa entrance sa sementeryo.
Sulod sa maong duha ka adlaw, gidili ang pagbaligya daplin sa kalsada ug dakpon sa mga polis, CTMS ug mga sakop sa solid waste management ang makit-an nga maninda og makadisturbo sa agianan padung sa mga sam-ang. Gidili usab ang pag-inom-inom niining mga adlawa ug ang pagdala og mga armas. – /EIM) (BANAT NEWS)