CEBU, Philippines – Duna na’y pangan ug suspek ang kapolisan sa nihimo sa pagpatay sa usa ka florist sa dalan Sikatuna, Day-as, dakbayan sa Sugbo niadtong Lunes sa buntag nga si Daniel “Jun” Cañete. Matud sa hepe sa City Intelligence Branch, Supt. Romeo Santander, nga nakuha nila ang impormasyon gikan mismo sa saksi.
Nagdumili hinuon sa pagtug-an si Santander sa pangan sa suspek ug sa identity sa mga testigos. Apan kini masaligon nga lig-on ang pamahayag sa ilang testigos nga mitukma sa ilang nahipos nga impormasyon.
Wala usab motakda og panahon ang kapolisan kun kanus-a posibleng masikop ang suspek apan kini masaligon nga sa labing daling panahon.
Usa sa subayon sa kapolisan ang taho nga gitulis ug gipatay ang biktima.
Sutaon usab kung usa ra ba ka tawo ang mihimo o duna pa’y mga kauban.
Nadiskubrehan na lang sa usa sa mga trabahante sa JMC Wedding Creation nga patay na ang ilang agawon sulod sa iyang flower shop buntag sa adlaw nga Lunes nga nakaangkon og samad dinunggaban sa tiyan ug nawala sab ang salapi’ng cash ug mga gadgets sulod sa maong establesemento. – /GMR) (BANAT NEWS)