Bata nalumos sa pool patay
CEBU, Philippines – Patay ang usa ka otso anyos nga bata human nalumos sa swimming pool sa pribadong tunghaan sa Banilad, Cebu City.
Ang namatay naila nga si Cherlene Panilagan, Grade 2 pupil ug nagpuyo sa Lower Tak-an, Budlaan.
Sa imbestiogasyon sa homicide section sa Cebu City Police Office (CCPO) nasayran nga kauban sa maong bata ang iyang mga ginikanan nga mitambong sa kalihukang relihiyoso nga gipahigayun sa maong lugar.
Apil sa lingaw-lingaw ang pagpangaligo sa swimming pool apan nalipat ang mga ginikanan ug wala nila nabantayi nga miipon og pagkaligo ang bata sa swimming pool para sa mga dagku nga lawom ang tubig.
Ulahi na nga nabantayan sa ginikanan nga nawala ang ilang anak ug nakita na lang nga nalumos na.
Ang amahan sa bata wala sab nakabantay sa iyang anak sanglit nagduwa kini og basketball isip kabahin sa programa nga ilang gitambongan samtang ang inahan nag-atiman sa ilang laing tulo ka mga gagmay nga anak.
Dali pa unta nga gidala sa Gullas Hospital ang bata apan nakabsan gyud sa iyang kinabuhi. – /GMR) (BANAT NEWS)
- Latest
