Korean naigo sa saag nga bala
CEBU, Philippines – Nalandig sa tambalanan ang usa ka Korean human naigo sa saag nga bala samtang nag-inom kauban ang iyang mga barkada sa may Seven Eleven, Mango Square Avenue, dakbayan sa Sugbo pasado ala una sa miaging kadlawon.
Ang biktima naila nga si Taeyoung Kang, 21, kasamtangan nga nagpuyo sa English Language Center sa Tabunok, Talisay City.
Usa ka guwardiya nga nadestino sa maong establesemento ang nakapahibawo sa Fuente Police may labot sa maong insidente.
Sa imbestigasyon sa kapolisan nasayran nga samtang nag-inom ang biktima ug kaubanan, kalit lang nakabatyag ang langyaw og pagpaminhod ug sakit sa kilid nga bahin sa iyang lawas.
Nasayran na lang ni Kang nga nakaangkon na kini og samad sa iyang kilid ug daling gidala sa Cebu City Medical Center (CCMC).
Ang kapolisan nakakaplag og usa ka slug sa wala pa matino nga kalibre sa armas.
Gisusi pa sa kapolisan ang posibleng nagpabuto sa armas ug nakaigo sa maong langyaw. –/GMR) (BANAT NEWS)
- Latest
