Kaso ni Ella Joy lisud apan may paglaum
CEBU, Philippines - Giangkon sa hepe sa Cebu Provincial Police Office (CPPO), Sr. Supt. Noel Gillamac, nga lisud na nga buhion pagbalik ang special investigation team aron pagtutok sa kaso ni Ella Joy Pique.
Kini ang reaksiyon ni Gillamac nunot sa tinguha nga pabuksan pagbalik ang kaso human gibasura sa korte ang kaso batok sa akusado nga si Bella Ruby Santos.
Matud ni Gillamac nga ang maong kaso dakung leksiyon sa kapolisan labi na sa mga police investigators.
Sigun pa ni Gillamac nga kun han-ay ug kompleto lang unta ang tanan nga kapasikaran sa usa ka kaso, segurado nga wala’y rason nga ibasura sa korte.
“For me, I think this is an eye opener sa ato’ang police investigators kung naa man gani kaso ingon ani, it should be thorough, para wala’y reason ang court to dismiss the case,” matud ni Gillamac.
Apan bisan sa kalamboan sa maong kaso, wala pa gihapon nawad-an og paglaum si Gillamac nga duna pa’y hustisya sa pamilya’ng Pique.
“Awhagon sab ang mga posibleng naay nahibaw-an aning kasoha nga at least to open up, para sad naa’y katin-awan kining kasoha, para sab paghatag og hustisya sa pamilya ni Ella Joy Pique,” panawagan ni Gillamac.
“Challenge ni sa amoa nga dili gyud magdali-dali pagsulbad sa kaso,” dugang ni Gillamac. (BANAT NEWS)
- Latest
