CEBU, Philippines - Higpit nga gi-monitor sa City Disaster Risk Reduction and Management Council ang mga lugar sa dakbayan sa Sugbo nunot sa kusog nga bunok sa uwan kagahapon.
Si Alvin Santillana, operations chief sa CDRRMC, nagkanayon nga alas 5:00 sa buntag kagahapon, si Bise Mayor Edgardo Labella mideklarar sa pagsuspenso sa klase sa elementary ug high school sa dakbayan sa Sugbo.
Ang deklarasyon ni Labella subay sa rekomendasyon ni Oscar Tabada sa PAGASA-Mactan nga ang uwan molanat hangtud sa hapon nga maoy hinungdan sa pagbaha ug naghatag og peligro sa mga estudyante ilabi na kadtong motabok og sapa.
Matud ni Santillana nga dunay mga tunghaan nga nahimutang sa lugar nga delikado sa pagdahili sa yuta. Kagahapon ang ubang lugar sa Sugbo ang gibahaan hinuon dunay mga lugar usab nga dali ra nihubas ang tubig dihang nihunong ang uwan. Ang mga bus sa dakbayan sa Sugbo gipa-istambay kagahapon aron dunay magamit nga masakyan sa mga pasaherong matanggong o dunay mga pamilyang pabakwiton.
Si Santillana nagkanayon nga minimal lang ang baha sa mga lugar sa dakbayan sa Sugbo ug wala’y dakung problema nga nasugatan kabahin sa baha.
Ang CDRRMC padayon sa paghatag og advisory kabahin sa lakat sa panahon ug giawhag kagahapon ni Santillana ang mga kabataan nga wala’y klase nga dili mosuroy o mangaligo sa uwan kay delikado kung maigo sila sa kilat ug magdugang na sila sa problema. Ang mga residente nga duol sa kasapaan giawhag usab kagahapon ni Santillana nga mobakwit dayun kung mabantayan nilang misaka na ang tubig sa sapa ingon man kadtong naa sa lugar nga delikado sa dahili sa yuta ang giawhag sa pagbiya sa lugar kung makabantay na sila og sinyales sa posibleng pagdahili sa yuta sama sa pagtagak-tagak sa mga bato. Dugang ni Santillana nga ang habig lang sa Barangay Tagunol ang medyo lawom ang baha diin miabot sa 10 ka pulgada ang giladmon apan matud ni Santillana nga normal diha sa maong lugar nga mabahaan.
Samtang gisuspenso usab ang klase sa kindergarten hangtud high school sa dakbayan sa Mandaue kagahapon.
Gibase ni Mandaue City Mayor Jonas Cortes ang iyang pagsuspenso sa klase sa taho sa PAGASA.
Si Roger Paller, Public Information Officer (PIO) sa kagamhanan sa maong dakbayan, nga nahinabi sa Banat News miingon nga ang deklarasyon ni Cortes human usab nahinabi niya si City Schools Division Superintendent, Dr. Virgina Zapanta.
Nunot sa pagsuspenso sa klase, gipahibawo ni Zapanta ngadto sa mga principal sa mga tunghaan sa pag-uswag na lang sa ilang second grading examination ngadto sa sunod semana.
Dugang pa ni Paller nga ang periodical test sa mga tinun-an alang sa second grading gikatakda unta kagahapon ug karong adlawa. (BANAT NEWS)