Tawo diriyot malubong-buhi

CEBU, Philippines - Usa ka 52-anyos nga trabahador diriyot malubong-buhi kagahapon sa udto dihang nahugnoan siya sa baga kaayo’ng lapok samtang nagkutkot sa bahirig nga bahin sa yuta sa Barangay Quiot, dakbayan sa Sugbo nga tukuran unta og koral nga semento.

Si Cyril Mahinay, 52-anyos, minyo ug taga Barangay Bulacao, dakbayan sa Sugbo naabtan pa sa mga rescue volunteers nga nalubong sa yuta ang katunga nga bahin sa iyang lawas.

Ang mga sakop sa Local Disaster Risk Reduction Management Office (LDRRMO) nga gipangulohan nila ni Sim Romarate ug Alvin Santillana miresponde dayon didto sa Genis Compound sa Barangay Quiot human sila nakadawat sa report nga adunay nahugnoan.

Matud ni Santillana nga pag-abot nila sa dapit gisugdan na sa mga kauban ni Mahinay ang paghaw-as kaniya apan nagpabilin nga nalubong pa ang katunga sa iyang lawas sa lapok.

Si Santillana misaysay nga samtang gitibhangan nila ni Mahinay ang bakilid nga yuta aron tukuran og koral, kalit kini nga midahili tungod sa pagkahumok sa uwan kagahapon.

Ang mga rescue volunteers sa dakbayan midala dayon ni Mahinay sa tambalanan human siya maugkat.

Samtang, balay nga gitukod daplin sa sapa sa Barangay Calamba naguba diha nga nahugno ang kabahin niini nga nag-umbaw sa Guadalupe River kagahapon sa udto.

Swerte kay walay bisan usa sa tagbalay nga naangol samtang gitan-aw karon sa City Hall unsay matabang nila sa tag-iya sa balay. (BANAT NEWS)